Indo-Pakistan border ah thla 2 chhung zan lam curfew puang

Jammu and Kashmir, Samba district-a India-Pakistan border aṭanga km 1 bial chhungah thla hnih chhung atan zan lam curfew puan a ni.

District magistrate Anuradha Gupta chuan thupek hi tichhuakin, thlasik ṭiauchhum a chhah avangin ramri kaltlanga dan kalha rawn luh tum leh, drone hmanga ralthuam tawlhluh tum venna atana tih a nih thu a sawi.

Thupek tihchhuahah hian zan dar 9 aṭanga a tuk zing dar 6 thleng chu international border-a an sawi huam chhungah hian civil mi tumah an kal phal a ni lo. Ṭul bik thila kal ngaite chuan an ID card chu BSF leh police thuneitute hnenah an entir zel a ngai dawn a ni. Samba district-a international border hi km 55-a thui niin, border area-ah hian thingtlang khua eng emaw zat a awm a ni.

Deputy SP Garu Ram Bhardwaj chuan vur a sur nasat leh, ṭiauchhum a chhah avangin hei hi remchangah hman tumin, firfiakte chu border area-ah an chetla nasa niin a sawi. Hei vang hian zan lama civil mite veivah khapna siam hian, ramri vengtu sipaite pawh a pui thei zawk dawn a ni, a ti.

Border Security Force official-te chuan khaw chin awmdan chu eng ang pawh ni se, sipaite chuan eng thil pawh hmachhawn turin an inpeih reng tih an sawi.

Pathianni khan J&K-a Rajouri-ah Hindu chhungkaw ṭhenkhat chenna in silai kengten an luhchilh a, he thil thleng hian mipute a tichiai phah hle. Hei vang hian Rajouri district-ah pawh lungawi lohna lantir a lo ni tawh bawk.