AP sorkarin roadshow buatsaih a khap

Andhra Pradesh-a YSR Congress Party (YSRCP) sorkar chuan December 28 leh January 1-a public rally neihnaa inpawngnekna thlenga nunna chan an awm hnuah, state chhungah roadshow buatsaih a khap. Telugu Desam Party (TDP) president N Chandrababu Naidu-a'n rally a buatsaihah, inpawngnekna thleng vangin December 28 khan Kandukuru ah mi pariat leh, January 1 ah Guntur khuaah mi pathum an thi a ni. Chhiatna a thlen hnu hian state sorkar chuan national highway leh state highway-ah public meeting leh rally neih a khap zui ta a ni. Public meeting nei turte chuan kawngpui dungah niloin, public ground emaw mimal hmunah emawte neih zawk tur a ni, a ti.

Sorkarin khapna thupek a siam hi eptu party lam chuan an sawisel nasa nghal hle. TDP state unit president K Atchennaidu chuan he thupek hi sorkarin phuba lak tumna, Chandrababu Naidu rally neih ṭhinin mipui a hip nasat avanga dan an tumna a ni tiin, Arunachal Pradesh tana chanchin lungchhiatthlak tak a ni, tiin a sawi.

Bharatiya Janata Party (BJP) general secretary S Vishnuvardhan Reddy pawhin state sorkar thupek siam chu sawiselin, khapna siam ngawt loin chetsualna thlengah chuan a buatsaihtute chungah action lak zawk tur a ni, a ti.

Hetih lai hian rorellai, YSR Congress Party general secretary Sajjala Ramakrishna Redd chuan he thupek hian political party zawng zawng, rorellai party pawh a huam tel vek tih sawiin, mipuite himna tura tih a nih thu a sawi. Mipuite himna chu sorkar chuan a ngaipawimawh hle tih a tarlang.