Covid-19 hri kai thar 228 awm belh

China rama Covid-19 hri leng a hluar chhoh leh kara India ramah pawh hri kai thar hmuh chhuah an pung chho leh hret a, mahse ram chhunga hri leng dinhmun erawh a la ziaawm zel.

Union home ministry-in nimin zinga data a tihchhuahah, Ningani khan ram pumah hri kai thar mi 228 awmin,hripui vanga thi mi pali an awm bawk. Nimin zing thlenga hri kai hmuhchhuah tawh hi mi vaibelchhe 4.46 an tling tawh.

Hripui vanga thi hi mi 5,30,714 an awm tawh. Ningania Covid-19 hri thihpui zinga pahnih hi Kerala state ami niin, Bihar leh Uttarakhand-ah pakhat ve ve an thi bawk.

Nitina hri kai thar, daily positivity rate hi 0.11% niin,kar khata hri kai thar hi 0.12% a ni bawk. Hri kai mek, active case hi hri kai tawh aṭanga 0.01% an ni mek a, hri kai enkawl dam tawh zat hi 98.80% a ni.

Ministry chuan ram pumah vaccine dose vaibelchhe 220.23 pek chhuah a ni tawh tih a tarlang bawk.

Union health minister Mansukh Madaviya chuan ram mipuite chu Covid-19 chungchang avanga chiai a ngaih loh thu a hrilh rualin, mitinte chu fimkhur chhunzawm zel turin a chah. Sorkarin hri leng inkaihhruaina a siamte chu ṭha taka zawm zel turin a ngen.

Minister chuan Covid variant hrang hrang chu ala rawn lang zel dawn tih sawiin, thu lengvakte avanga chiai mai loin sorkar thuchhuah chauh ngaihven ṭhin turin a chah bawk.

Sorkar laipuiin ram dang aṭanga khualzin lutte tana kaihhruaina thar a siam leh hnuah, December 24-January 3 inkara international passenger-te sample test-naah Covid-19 omicron sub-variant 11 hmuhchhuah a nih thu official-te chuan an sawi. Hemi chhung hian international passenger 19,229 sample endik niin, an zinga 124 chuan Covid-19 hri hi an kai tih hmuhchhuah a ni.

India rama Covid-19 hri kai hmuh chhuah hi kum 2020, August 7 khan nuai 20 tlingin, August 23-ah nuai 30, September 5-ah nuai 40 leh September 16-ah nuai 50 niin, hemi kum December 19 khan vaibelchhe 1 an tling chho a ni. Nikum January 25 khan hri kai hi vaibelchhe 4 an tling a ni.