2022-ah US-in India tan student visa nuai 1.25 pe chhuak

India ramah US embassy leh consulate-te chuan fiscal year 2022-ah student visa nuai 1.25 dawn pechhuakin, kum 2016 hnua an pek chhuah tam ber ṭum a nih thu state department thupuangtu Ned Price chuan a sawi.

Ned Price chuan Indian tourist visa dilte duh angin an tifel chak lo tih an pawm thu a sawi a, hemi rual hian kum khat chhunga student visa pekchhuahah chuan record an siam thu a sawi a ni. "Visa diltu ṭhenkhatin hun rei tak an nghah a ngai tih pawh kan hria a, hei hi chinfel a, visa interview appointment nghah chhung pawh a rei lo thei ang bera tih tumin hma kan la mek a ni," a ti. Hemi atan hian thawktu pawh tam tak chhawr belh tih a sawi a ni.

US embassy official pawhin nikum November thla khan kum 2023-ah chuan US-in visa a pekchhuah tam lamah India chuan China a khum chhoh an rin thu a lo sawi tawh bawk.