Railway rama awmte chhuahtirna tur SC-in a dan sak

Uttarakhand High Court-in Haldwani-a railway ram, acre 29-a zaua awma chhuahtirna thupek a lo tihchhuah tawh chu Ningani khan Supreme Court chuan a 'stay' sak.

Supreme Court chuan Railways leh Uttarakhand state sorkar hnenah hriattirna pe nghalin, High Court-in railway rama awmte in leh lo tihchhiatsak tura thupek a tichhuah khinlet chungchangah chhanna pe turin a ti bawk.

Court chuan zankhat thil thuah mi 50,000-te dinhmun tichhiatsak vek tur a ni lo a ti a, hemi rual hian an awmna ram chhunga in sak leh cheiṭhat te erawh a khap nghal. He case hi February 7-ah ngaihtuah chhunzawm leh a ni ang.

Railways lamin an tarlan danin, Haldwani-a an ramhuam chhungah hian chhungkaw 4,000 chuang, mi 50,000 dawn an cheng a, a tam zawk chu Muslim an ni. Nikum December 20 khan Uttarakhand High Court chuan railways ram chhunga chengte chu an in ṭhiat a, an awmna hmun chhuahsanna tur thupek a tichhuak a, kar khat chhung hun a pe. Hun pek chhunga an chhuah loh chuan an in leh lote chu tihchhiatsak an nih tur thu a tarlang.

Hetih lai hian he hmuna cheng tam tak chuan an chenna chu sorkarin a lilamna aṭanga an leite a nih thu an sawi. Railways ram nia sawi acre 29 huam chhungah hian chenna in tam tak bakah sakhaw hmun pawimawh, school, leh sumdawnna hmunte pawh a awm a ni.