Bureaucrats hlui 100 chuangin BJP MP Pragya Thakur hrem phut

Bureaucrats hlui 100 chuangte chuan open letter thawnin, Madhya Pradesh-a Bhopal bialtu, BJP MP Pragya Thakur chu Karnataka-ah Hindu ni lote huatna lam thu leh, buaina chawk chhuak thei zawnga thu a sawi avangin hremna pek ngei an phut.

Open letter-ah hian Thakur hi inhuatna lam hawia thu a sawi fo vangin Parliament member-te nih dan leh awm dan tur chu a bawhchhia a ni, an ti. Parliament chuan a member-te ram danpui kalh leh bawhchhe zawnga an awm a remtihsak tur a ni lo, tiin an sawi. Hei vang hian Lok Sabha speaker chu Committee of Ethics hnenah MP Thakur-i chungchang hi thlen a, a ṭul anga action la nghal tura an phut thu an sawi.

Thakur hian December 25-a Shivamogga-a thu a sawi ṭumin, Hindu-te chuan anmahni beitute chu beilet turin dikna an nei a ni, tiin a sawi. Pungkhawmte hnenah anmahni beitute chu an phu ang taka chhang let zel turin a chah. An lo beih letna tur hmanruate chu inah kawl vek tura tiin, eng thil mah a thleng lo a nih chuan an chemte chu thlai channa atante a la hmang zui thei tho a, eng ang boruak nge thleng dawn hriat a ni lo, ti tein a sawi a ni.

Open letter thawntu zingah hian Delhi lieutenant governor hlui Najeeb Jung, foreign secretary hlui Shivshankar Menon, IPS officer hluite - AS Dulat, Julio Ribeiro leh Amitabh Mathur, IAS officer hluite - TKA Nair leh K Sujatha Rao-te an tel.

MP Thakur hi a thusawi dan avang hian Indian Penal Code hnuaiah dan eng emaw zat a bawhchhia a, Parliament member a nihna anga ram danpui humhalh tura a intiamna a palzut bawk a ni, an ti.