Uttarakhand : Lei tlahniama chengte sawn chhuahna tur buatsaih turin CM-in a hriattir

Uttarkhand chief minister Pushkar Singh Dhami chuan Joshimatha-a lei khi leh lei tlahniama chengte sawnchhuahna tur, temporary rehabilitation centre lian tak siam turin official-te a hriattir.

CM hian kar liamta kartawp khan high-level meeting koin, Joshimath-a hmun him chinah rehabilitation centre siam tur hian a hriattir a ni. Danger zone-a awmte chu a rang thei anga sawnchhuak tur leh, disaster control room pawh siam nghal turin a ti bawk.

Joshimath khuaa lei tlahniam vang hian district thuneitute chuan National Disaster Response Force (NDRF) an tir nghal a, expert team chu lei tlakhniamna hmunah hian kalin, in tinah survey an nei nghal bawk.

Uttarakhand-a Joshimath khuaah hian chhungkaw 560 chuang chenna bial huam chhungah lei tlahniamin a khi nasa hle a, mipuite pawh an chiai phah hle. Chhungkaw 50 chu hmun him lamah sawnchhuah an ni tawh. He khuaah hian lei tlahniam vangin kawngpuite hi a khi fo a, mahse kumin anga nasa hian a la thleng ngai lo. Tualchhung mite chuan sorkar chuan lei khi thleng ṭhin chu a ngaihven ṭha ngai lo niin an puh.

Chief Minister chuan scientist-te pawhin lei khite hi an enfiah mek thu a sawi a, hemi rual hian mipuite himna chu ngaihpawimawh ber a ni, a ti. Lei khi hi a la awm belh zel a ni.

Joshimath khuaa lei khi leh tlahniam vang hian nimin khan Prime Minister Office pawhin high-level meeting a ko. Meeting-ah hian NDMA official leh Uttarakhand sorkar aiawhte pawh an tel.

Chamoli district-a awm, Joshimath khua hi meter 6,000-a sanga awm niin, tourist town hriat hlawh tak a ni. Badrinath, Hemkund Sahib, Auli leh Valley of Flowers bakah sakhaw hmun pawimawh tlawh tuma kalten chawlhna atana hman ṭhin niin, Indian Army tan pawh hmun pawimawh tak a ni bawk.