Delhi-ah khaw vawt leh chhum chhah vangin Orange alert tichhuak

Delhi khawpuiah khaw vawt a la zual zel a, Inrinni liam ta khan khaw vawt lam hi a 'minimum'-ah 1.5 degree Celsius a tling. Delhi hi hilly state, Himachal Pradesh leh Uttarakhand hmun tam tak leh, Jammu and Kashmir-a hmun tam tak aiin tunlai hian a vawt zawk a ni.

Khaw vawt tak hnuaia ṭiauchhum chhah tak a zing bawk a, nimin zing khan Indira Gandhi International airport chhehvelah chuan chhum chhah vangin meter 25 chin bak a hmuh theih lo a ni. Chhum chhah vang hian rel tam tak tlan hun tihkhawtlai a ni bawk.

Indian Meteorological Department (IMD) chuan thli vawt tleh leh chhum chhah vangin nimin khan Delhi khawpui bakah North India hmun ṭhenkhatah mipuite fimkhur tura chahin, Orange alert a tichhuak.

IMD chuan khawvawt hnuaia awm rei chuan 'frostbite' te a thlen thei tih sawiin, mipuite chu inchhung lumah awm tam turin a chah. Vitamin C tamna thei leh thlai lam ei tam tur te, thil lum in tam turtein a chah bawk.