Uttarakhand-a Joshimath khua chu chhiatrupna thleng mai thei dinhmunah puan a ni; Chhungkaw 68 sawnchhuah an ni tawh

Uttarakhand-a Joshimath khua lei tlahniam chuan chenna in leh inkalpawhna kawngpuiah lei khi nasa tak a siam chhunzawm zel avangin khuarel chhiatna thleng thut thei, disaster-prone area-a puan a ni a, nimin thleng khan thuneitute chuan chhungkua 68-te chu hmun him lamah an sawnchhuak tawh a ni.

Chamoli district magistrate, Himanshu Khurana chuan Joshimath khua chu disaster prone-ah puan niin, sorkar laipui team pahnih chu tirhluh vat an nih tur thu a sawi.

"Sorkar laipuia team tirh luh tur zingah Jal Shakti ministry pawh tel tur tirh an ni. Joshimath leh a khawbul hnaihah insak leh hmasawnna hnathawh hrim hrim khap a ni. Chhiatna tuar chhungkua hnenah Dry ration kit thawn an ni bawk," tiin senior official chuan a sawi.

Official-te tarlan danin, building za chuang a chim hnuah leh, khaw chhunga inkalpawhna kawng ah lei khi nasa tak a thlen zel avangin chhungkua 68-te chu chenna lailawk an siamah an khawsa mek tih an tarlang.

Chief Minister Pushkar Singh Dhami chuan mi zawng zawngte chu pawl anga thawkho tur leh an khua chu chhanhim turin mipuite a sawm. CM chuan PM Narendra Modi pawhin an state chu uluk taka a thlithlai reng thu leh, state sorkar tan a ṭul leh mamawhna zawnah ṭanpui zel a intiam thu a sawi.

Mi 17,000 vel chenna, Joshimath khuaa chenna inah leh kawngpuiah leitlahniam leh lei khi a thlen chhoh zel avangin fimkhur tura inralrinna an tichhuak. District thuneitute chuan lei tawlh mai thei bula khawsate chu a rang thei ang bera inthiarchhuak turin an ngen.

Mithiamte chuan chhiatna thlen chhanah, hydropower project, infrastructure development plan mumal loh vanga thleng niin an ngai.

Indian National Science Academy-a an scientist, DM Banerjee chuan hydroelectric project an kalpuinaa kawng an sialna lamah leh lei an verh chhunzawm zel vangin chhiatna hi a zual phah tih a sawi. "Joshimath hi lesser Himalayas huamchhunga mi a ni a, a leilungte hi Precambrian hunlai a mi niin, he territory hi seismic zone 4-ah an awm mek. Mipuite'n heng lai chhehvelah hian in an sa tur a ni lo a, a bikin chenna in lain chhawng 3-4 inkar sak phei chu thil hlauhawm tak a ni," tiin scientist chuan a sawi. Mi tam tak chuan chhiatnaa mawhphurtuah National Thermal Power Corporation (NTPC)-in hydroelectricity project an kalpui chu an mawhpuh a, khuaa chengte chuan NTPC project-in puakthei thil an hal avanga a nghawng an tuar nasat zia thute thla hmasa khan state CM hnenah ṭum thum lai ziakin an lo thlen tawh a ni.