Joshimath-a lei tlakhniamna hmuna in ṭhiat ṭan

Uttarkhand-a Joshimath khuaa lei tlakhniamna huam chhunga in khi leh chhiate chu in dang a tichhiat bel zel tur venna atan nimin aṭang khan ṭhiah ṭan a ni.

Joshimath khua hi zone thumah ṭhenin, 'danger', 'buffer' leh 'completely safe' ah ṭhen a ni. Danger zone-a inte hi ṭhiah tura tih niin, chenna in eng emaw zat bakah hotel pahnih - Mount View leh Malara Inn te chu ṭhiah tura tih zingah hian a tel.

Expert panel-in lei tlakhniamna hmunte an enfiah hnuah in ṭhiat dingte hi ṭhiat turin a rawt a, Central Building Research Institute (CBRI), Roorkee-a expert team-te enpuina hnuaiah ṭhiah a ni. A ṭul anga pui turin National Disaster Response Force (NDRF) team dah an ni bawk.

Chief minister Puskhar Singh Dhami chuan khaw mipuite chu an khaw chhanhimna tura theihtawp chhuah turin a ngen.

Joshimath khuaa lei tlahniam leh khi vanga harsatna an tawh hnuah, Chamoli district ami vek, Karnprayag khuaa Bahugun Nagar hmunah in 50 vel chu a khi ve leh. Khawchhung mite chuan CM Shami hnenah pui tura ngenna an thlen nghal a ni. Bahuguna Nagar-a cheng ṭhenkhat chu an in a khik vang hian hmun dangah an insawnchhuak tawh a ni.

Supreme Court chuan Joshimath khuaa lei tlakhniam chungchanga petition thehluh chu January 16-a ngaihtuah turin a ti. Chief justice of India DY Chandrachud chuan petition chu ngaihtuah nghal tura dah zingah telh ni mah se, thil hmanhmawh thlak leh pawimawh zawng zawng chu court-a buaipui tur a ni vek lo tih sawiin, mipuite an aiawha an thlan chhuah, a ngaihven turte an awm a ni tiin, hengte hian an huam chhunga mite chu an buaipui thei a ni, a ti.