Bharat Jodo Yatra-ah J&K statehood pek let phut dawn

Congress party hruaitu, Rahul Gandhi kaihhruaia Bharat Jodo Yatra neih mek chuan January 20 hian Kashmir an lut dawn a, Kashmir an luh hunah hian BJP kaihhruai sorkar laipuiin Jammu and Kashmir state nihna a ṭhiatsak chu pe let leh tura phutna an lantir tel dawn tih Congress hruaitu Vikar Rasool Wani chuan a sawi.

Jammu and Kashmir Pradesh Congress Committee (JKPCC) president Wani chuan Lakhanpur aṭang Srinagar pana kawngzawhnaah Rahul Gandhi hi Congress worker tam takin an zui dawn a ni, a ti. Lieutenant governor Manoj Sinha-a'n yatra neih tur atana phalna a pe chu lawmthu a sawi nghal bawk.

Wani chuan, "Punjab-ah ni 10 chhung hun an hman zawhah, Bharat Jodo Yatra hian January 20 hian J&K-a Lakhanpur an rawn lut tawh dawn a ni. J&K Congress chuan Lakhanpur-ah a hmuahna ropui takin lo buatsaih a tum," tiin nimina party headquarters-a chanchinthar lakhawmtute a kawmnaah a sawi.

Congress hruaitu chuan yatra hian a tum ber chu India ram pumkhatna ṭha siam a, inhuatna leh inṭhendarhna lam hawi politics hnawl a nih thu sawiin, ram chhunga thil man sang chak lutuk leh hnathawh nei lo pung chho zel chungchangte pawh tarlan a ni bawk, a ti. Mahse J&K an thlen hun hian thil phut pakhat an lantir tel dawn a, assembly inthlan neih hmaa state nihna pek let leh a tel tawh dawn a ni, a ti. State chhunga pawl hrang 90 chuangin yatra hi lo zawm an tum thu an sawi tawh niin a tarlang bawk.