Delhi LG-in sipai sawiselna thu ziaktu Shehla Rashid-i khin a remti

Delhi Lieutenant governor VK Saxena chuan Indian Army sawiselna thu ziaktu, Jawaharlal Nehru University students union vice president hlui leh All India Students Association (AISA) member Shehla Rashid-i khin a remti.

LG office chuan hemi chungchangah hian thuchhuah siamin, "Delhi LG Saxena chuan India Army sawiselna thu vawi hnih tweet a, pawl hrang hrang inkara inhuatna chawk chhuak thei thil ziaktu JNUSU hruaitu hlui leh AISA member Shehla Rasid-i khin chu a remti a ni," a ti.

Shehla Rashid hian kum 2019 khan a twitter-ah sipaite chu J&K-ah a chenna inah lutin, mipa naupangte an hruai chhuak a, chenna inte suasamin, chhuatah ei turte an thehdarh niin a sawi. A tweet pakhat zawkah chuan, "Shopian khaw mi pali chu Army Camp-ah koin nghaisak an ni a, an hmui bulah microphone dahin, an na tuar au rite chu midangte hriat turin tihchhuah a ni. Hei vang hian mipuiteah hlauhna nasa tak a thlen a ni," tiin a tarlang bawk. Mahse heng a puhnate hi Indian Army chuan thu dik lo niin an sawi thung.

A thu ziah avang hian kum 2019 khan Alakh Alok Srivastava chuan Rashid-i lakah hian complaint a thehlut a, hemi bawhzui hian New Delhi-a Special Cell police chuan IPC section 153A hnuaiah FIR an lo ziaklut tawh bawk.