Joshimath-a in ṭhiahsak turten chhawmdawlna pek phawt phut

Uttarakhand sorkarin Joshimath khuaa lei tlakhniam leh khikna hmuna in awmte ṭhiah a tum chu tualchhung miten an dang. In neitute hian chhawmdawlna ṭha tak pe phawt turin an phut.

Lei khi vang hian building 723 chu a chhe ṭhen a, heng zinga 86 chu awm zui zelna atana him lohah puan a ni. Chhungkaw 132 chu sawnchhuah ni tawhin, sorkarin relief camp lailawk a siamah an khawsa mek a ni. Sorkar chuan expert panel-te thurawn angin, lei khikna biala awm building-te chu ṭhiah turin a ti a, ṭhiah tura tih zingah khan he khuaa hotel lian pahnih - Mount View leh Malari Inn pawh a tel.

Mount View leh Malara Inn hi a building te a awn tawh a, an bul vela inte tan a hlauhawm theih avangin ṭhiah hmasak tura tih an ni. Mahse Thawhlehnia in ṭhiah tura State Disaster Response Force (SDRF) company pathum tirhte chu tualchhung miten lo dangin, an lo au khum a, sorkar chuan hotel leh building dangte a ṭhiah hmain chhawmdawlna a pek phawt an lo phut a ni. Hei vang hian Thawhlehnia in ṭhiah an tum pawh an ṭhulh phah a ni.

He thil thlen hnuah, nimin khan Uttarakhand sorkar chuan in ṭhiah sak turte chu chhawmdawlna, Rs nuai 1.5 ṭheuh pek an ni dawn tih a puang. Principal secretary to chief minister, R Meenakshi Sundaram chuan in sawn chhuah ngaite hi Rs 50,000 pek lawk phawt an ni dawn tih sawiin, sorkar chuan an mamawh hrang hrangte a ngaihtuah sak zel dawn a ni, a ti. Mi in luah ngaite pawh thla ruk chhung chu in luah man tur, Rs 4,000 zelin pek an ni ang tiin a sawi bawk.

Dehradun-a Indian Institute of Remote Sensing-in satellite data hmanga a zirchianna aṭangin, Joshimath leh a chhehvel bial hi kum khatah cm 6.5 - inches 1.5 velin a tlahniam a ni. Satellite image hi July, 2020 aṭanga March, 2022 inkar ami lakhawmin zirchian a ni a, lei hi a tlahniam zel tih hmuchhuah niin, Joshimath khua chauh ni loin a bul vela phairuam pawh a tlahniam tel a ni.