Punjab CM-in officer nuarte hna zawm turin hriattir; Hna zawm lote chu suspend nghal an nih tur thu a sawi

Punjab chief minister Bhagwant Mann chuan nimin khan Punjab civil service officer, an thawhpui pakhat dan loa man nia sawia lungawi lohna lantirna atana mass leave la te chu an hna zawm nghal turin a hriattir. CM chuan nimin chawhnu dar 2 thleng an hnaa kal lote chu suspend an nih tur thu a sawi.

Chief Minister chuan, "Hetianga nawrh huaihawt hi in blackmail tluk tho a ni," a ti.

PCS officer Narindra Singh Dhaliwal chu thamna laa puhin Ludhiana-ah state vigilance bureau in a man a, man a nih dan hi dan kalh nia sawiin, PCS officer dangte chuan Thawhṭanni khan lungawi lohna lantirin ni nga chhung mass leave an la a ni. Officer-ten an ruala chawlh an lak avangin sorkar office hrang hrang a nghawng nghal a, hei vang hian CM chuan thuchhuah hi a siam a ni.

Mann chuan, "Nawrh huaihawtin officer ṭhenkhat an hnaah an kal lo tih ka lo hria a. Sorkarin officer eirute laka action a lak chu an duh lo a ni," tiin, a kaihhruai sorkar chuan eirukna chu a enliam mai mai dawn lo tih a sawi nghal bawk. Officer-ten nawrh an huaihawt chu dan kalh a ni tiin, nimina an hna kal loa chawlte chu suspend an ni dawn tih a sawi.

Ludhiana-a regional transport authority-a awm, PCS officer Narindra Singh Dhaliwal hi lirthei dan bawhchhetute hnen aṭangin hrem an pumpelh theihnan thamna a dawng nia sawi a ni a, kar liam ta Zirtawpni khan man a ni.