PCS officer-ten nawrh titawp

Punjab Civil Service Officers Association chuan an thawhpui pakhat man a nih dana lungawi lohna lantira nawrh an huaihawt chu sorkar aiawh nena an inbiak hnuah Nilaini chawhnu lam aṭang khan an titawp.

PCS officer-te hian Thawhṭanni aṭang khan lungawi lohna lantir nan mass leave an la a, mahse chief minister Bhagwant Mann chuan officer-te hi an hna zawm nghal tura tiin, Nilaini chawhnu dar 2 thlenga hna zawm lote chu suspend-ah a vau a ni. Hemi hnu hian additional chief secretary to the chief minister,Venu Prasad leh PCS officer nuarte hi inbiain, Nilaini chawhnu khan an nawrh hi kar khat chhung atan an titawp.

PCS officers association president Rajat Oberoi chuan, kar khat chhung atan nawrh tihtawp phawt a nih thu leh, PCS officer mantu vigilance official-te chunga action lak an phut thu a sawi. He officer hi thamna laa puh a nih avangin man a ni a, mahse special investigation team-in an chhui chian hnuah thil dik lo tih a nei lo tih an sawi a ni.

Venu Prasad chuan nawrh tihtawp ni mah se, case thehluh chu tihtawp a ni dawn lo tih saiiwn, sorkarin eiruk do beihpui a thlakna chu kalpui zel a ni ang, a ti. "Chief Minister-in chiang taka a lo sawi tawh angin, officer eirute chu tumah hum an ni dawn lo," a ti. Officer tinte chuan state hmasawnna turin an thawk a, nawrh huaihawtte ngei pawh hian eirute chu hum an ni dawn lo tih an hrechiang tih a sawi.