PM Modi-a'n river cruise thui ber tur a vai liam

Prime minister Narendra Modi chuan nimin khan river cruise thui ber tur, MV Ganga Vilas chu video conference hmangin a vai liam.

MV Ganga hi Varanasi, Uttar Pradesh aṭanga kal ṭanin, Bangladesh kaltlangin Diburgarh, Assam an pan dawn a ni.

MV Ganga Vilas hi India rama cruise vessel siam hmasak ber niin, Assam thleng tur hian ni 51 thangin, km 3,200 chuang a kal ang. A zinchhuahna hmasa berah hian Switzerland mi, tourist 32 an chuang a ni. Varanasi aṭanga an chhuah hma hian hmun pawimawh hrang hrang an tlawh hmasa a ni.

Cruise director Raj Singh chuan five-star moving hotel-ah hian suite 18 awmin, khualzin 36 an awm theih thu a sawi. Hei bakah hian crew member 40 an awm bawk. He lawng hi meter 62-a sei leh meter 12-a zau a ni. Spa, salon leh gym-te pawh awmin, cruise-a kal man hi ni khatah Rs 25,000 - 50,000 inkar a ni a, ni 51 chhung hian passenger pakhat hian Rs nuai 20 vel a seng ang. Sewage Treatment Plant dah a nih bawk vangin Ganges-ah engmah bawlhhlawh paih a ni dawn lo a, filtration plant dah tel a nih avangin Ganga lui tui pawh inbualna leh thil danga hman tlak turin a tithianghlim vek tih cruise director chuan a sawi bawk.

An zinkawngah hian river system 27 leh hmun pawimawh tak tak an kaltlang/paltlang. Uttar Pradesh tourism minister Jaiveer Singh hian curise-in a paltlang tur zingah hian tourist destination 50 a awm a, heng zingah hian world heritage site, national park, river ghat leh khawpui lian eng emaw zat an tel tih a sawi.