January 31 aṭangin Parliament Budget session ṭan dawn

Parliament budget session chu January 31 aṭangin neih ṭan a ni dawn a, April 6 thleng a awh ang.

Parliamentary affairs minister Pralhad Joshi chuan budget session neih hun tur hi nimin khan puangin, ni 66 chhung hian rorel ṭhutkhawm ṭum 27 neih a ni dawn a, tihdan phung angin session chhung hian chawlh a awm ang.

Session ṭanni hian president Droupadi Murmu chuan Parliament Central Hall-a Lok Sabha leh Rajya Sabha joint sitting-ah thu a sawi dawn a, hei hi nikum August thlaa President atana lakluh a nih hnua Parliament in hnih hmaa thu a sawina hmasa ber tur a ni.

February 14 - March 12 chhungin session hi chawlh lailawk a ni ang a, hemi chhung hian department hrang hrangten demand for grants te zirchiangin, ministry-ah report an siam ang.

Budget session thawh khatnaah hian House pahnih chuan President's Address-a Motion of Thanks sawihoin, union budget pawh uluk takin an sawiho dawn a ni. Prime minister Narendra Modi chuan Motion of Thanks debate a chhang ang a, union finance minister Nirmala Sitharaman-i'n union budget debate a chhang bawk ang.

Session thawh hnihnaah legislative agenda bakah ministry hrang hranga demands for grant sawiho a ni dawn bawk a ni.