Ni 12 chhungin Joshimath khuaah lei cm 5.4-in a tlahniam hman

Indian Space Research Organisation (ISRO)-a National Remote Sensing Centre chuan Uttarakhand-a Joshimath khua lei tlakhniam dan satellite image tichhuakin, ni 12 (December 27,2022 - January 8, 2023) chhungin lei hi cm 5.4 in a tlahniam hman a ni.

Satellite image aṭanga a lan danin, lei tlakhniamna lai hi Joshimath khaw laili, Army Helipad leh Narsingh Mandir awmna lai a ni.

Lei tlahniam vang hian kawng leh chenna in tam tak a khi a, he bial chhunga chengte chu insawnchhuak tur leh, chenna in chhia leh khi eng emaw zat chu ṭhiat turin sorkarin a ti bawk. Mahse in ṭhiahsak turte hian chhawmdawlna pek hmasak phawt an phut a, hemi hnu hian sorkar chuan in ṭhiahsak turte chhawmdawlna, Rs nuai 1.5 pek an ni dawn tih a puang.

Ningani aṭang khan lei tlakhniamna hmuna hotel lian pahnih, Malari Inn leh Mount View Hotel chu ṭhiah ṭan a ni a, mahse khua a chhiat avangin chawlhsan leh lailawk a ni.