Finland-a zirtirtu training turte BJP-in a dansak niin Delhi sorkarin puh

Delhi-a Aam Aadmi Party (AAP) sorkar leh central-a rorellai, BJP-te an la inbeih chhunzawm zel a, AAP sorkar chuan BJP chu politics tenawm tak khel a, Delhi sorkarin Finland-a training tura zirtirtu a tirh tum dansakah a puh.

Delhi deputy chief minister Manish Sisodia chuan zirtirtu 1,100 velin ram dangah training an neih thu sawiin, Singapore, UK leh Finland-ahte tirh an ni, tiin nimina press conference a neihah a sawi. Mahse BJP chuan anmahni thuin department-te hnathawh danah thu rawn neiin, sorkarin zirtirtute training ṭha ber neihtir tuma hmalakna chu politics tenawm tak hmanga dan an tum a ni, a ti.

Sisodia chuan zirtirtu 30-te chu Finland-ah training tura tirh an tum a, mahse lieutenant governor VK Saxena chuan a tihkhawtlai sak tih a sawi. Lt Governor chuan naupang hmalam hun a ngaih pawimawh a, an zirna thlengin an tawrh phah a duh loh chuan BJP thiltih chu a thlawp tur a ni lo, a ti.

Finland-a zirtirtu tirh a tum chungchanga file an thehluh hmasakah, LG chuan a senso ngaihtuaha hlawkpui a nih theih dan turte zawtin, India ram chhungah an ti thei mai lo em ni tia zawtin an file hi a la dansak a ni. "Prime Minister leh BJP chief minister-te pawh World Economic Forum-ah an kal dawn a, an senso tur leh hlawkpui dante chhutin anni pawh hi in dang ve dawn em ni?" tiin Sisodia chuan LG governor thiltih dan chu a zawt let. LG hnenah hian file hi an thawn nawn leh dawn tih a sawi bawk.