Joshimath : Expert-te hnenah data tichhuak lo turin hrilh

Uttarakhand-a Joshimath khuaa lei tlakhniam mek chungchangah, National Disaster Management Authority (NDMA) chuan government institute leh scientific organisation hrang hrangte chu media hmaa thil sawi mai lo tur leh, social media lamah pawh data tichhuak lo turin a hrilh.

NDMA chuan Joshimath khuaa thil thleng chungchang media mite hmaa an puan leh social media lama an thehdarh ṭhin chuan a khaw mite mai ni lo, ram puma mipuite a tichiai thei a ni, a ti.

Indian Space Research Organisation (ISRO)-a National Remote Sensing Centre-in khaw chhung hmun ṭhenkhata lei tlakhniam chak dan a report leh, sattelite image a dah chhuah chu NRSC website aṭang hian lakthlak a ni leh tawh bawk. Report-ah hian Joshimath khua hi a tlahniam chak hle a, ni 12 chhungin cm 5.4-in a tlahniam hman nia tarlan a ni. Hetihlai hian nikum April leh November inkara lei tlakhniamna chu cm 8.9 a ni thung.

NRSC official-te chuan an report an lakthlak leh chhan hi an sawi lo a, mahse Uttarakhand chief minister Dhan Singh Rawat chuan ISRO report vang hian Joshimath khaw mite an chiai phah nasa hle a, hei vang hian ISRO director hnenah report hi lathla tura a ngen thu a sawi.

Union home minister Amit Shah pawhin platform hrang hranga Joshimath khaw chanchin tihchhuah a nih dante thlirin, kar liam ta Ningani khan review meeting a lo neihpui tawh bawk. Hemi hnu hian NDMA chuan media mite hnena thil sawi mai lo tur leh, social media lamah pawh data tichhuak lo tura hriattirna hi a tichhuak zui a ni.

Khawchhunga thil thlen dan hi expert panel-in an zirchiang mek a, final report hi NDMA chuan a tichhuak dawn a ni. Hei vang hian final report an tihchhuah hma chu media platform lamah eng thil mah lo post lo turin a ngen. "Sorkar institution ṭhenkhatin social media lamah data te an lo tichhuak a, media mite kawmin anmahni rinthute an lo sawilang bawk. Hei hian mipuite a tichiai a ni," a ti.