Army Day pualin PM-in sipaite duhsakna hlan

Prime minister Narendra Modi chuan nimin January 15, Army Day pualin sipai leh veteran-te duhsakna a hlan a, ram mipuite chuan sipaite chu an chhuang takzet tih a sawi.

PM chuan a twitter kaltlangin sipaite duhsakna hi a hlan a, englai pawha ram venhimna atana an inpek chu fakin, hun harsa leh khirh tak kara an inpeknate chu mipuiten an ngaisang hle a ni, a ti.

President Droupadi Murmu pawhin sipaite leh an chhungte chu duhsakna a hlan a, ram tana sipaite te inpekna sawi tur tam tak a awm thu sawiin, chhiatna a thlen pawha chhanchhuaktu, huaisen taka hmahruaitu an ni tiin zahna chibai a buk.

Chief of Army Staff general Manoj Pande chuan Army Day vawi 75-na pualin Indian Army hnuaiah sipai, veteran leh an chhungte zawng zawng duhsakna a hlan ve bawk. Gen Pande chuan ramri dinhmunte sawi zuiin, hmarlam ramri chu a boruak a ṭha a, boruak muanawm tak a awm zel theihna turin hma lak zel a ni, a ti. Khawthlang lam ramriah pawh Line of Control (LoC)-ah inkahhai puan chhunzawm zel niin, he inremna bawhchhiatna thleng pawh hi a tlem chho zel tih a sawi bawk. Hemi rual hian ramri kaltlanga firfiak rawn luh tum an la awm reng a, a dan hna pawh thawh zel a nih thu a sawi. Jammu leh Punjab-a international boundary sector-ah hian ruihhlo leh ralthuam tawlhluhna atan drone-te hman ṭhin a nih thu sawiin, sipai hotu chuan heng drone-te lo dang tur hian technology hrang hrang an hman ve mek thu a sawi bawk.

Kumtin January 15-ah Army Day hi hman a ni ṭhin a, he ni pual hian Delhi Cantonment-a Cariappa Parade Ground-ah parade neih a nih ṭhin.