Finland-a zirtirtu tirh tumna Lt Governor-in a dan vangin Delhi CM leh APP MLA-te lungawi lohna an lantir

Delhi-a Aam Aadmi Party (AAP) sorkarin Finland-a zirtirtu training tura tirh a tum chungchangah lieutenant governor VK Saxena inrawlh a, a lo dan sak avangin nimin khan chief minister Arvind Kejriwal-a hoin AAP MLA-te lungawi lohna lantirin kawng an zawh.

Chief Minister kaihhruaiin AAP MLA-te hian state assembly rorel inkhawm tihtawp a nih hnuah, LG Saxena chenna in panin kawng an zawh a ni. AAP chuan Finland-a primary school zirtirtu training tir tumna chu Governor hian a lo hnawlsak niin an sawi a, nimina assembly inkhawmah pawh member lungawi lohna an aubuai avangin inkhawm tihtawp a ngaih phah a ni. Hetih lai hian Governor chuan sorkar rawtna hi a hnawlsak lo nia sawiin, a senso turte zirchiang a, kum hmasa lama hetianga training an neihtir hi an hlawkpui em tih leh, ram chhunga training programme awmte chu zirchiang turin thurawn a lo pe zawk niin a sawi thung.

CM Kejriwal chuan, 'Delhi sorkar chu Delhi mipuiten an aiawh tura an thlan a ni. Senso tur pawh Delhi mipuite chhiah pek niin, hei hi Delhi-a chengte zirna atana hman tum a ni. LG hian eng nge buaina a lo neih ve chhan?" tiin a zawt. Kawngzawhnaa tel MLA-te hian LG chu Finland-a zirtirtu training tir phalsak tura an phutna thuziak an keng vek bawk.

Assembly rorel inkhawma Finland-a zirtirtu tirh tum chungchangah AAP leh BJP MLA-te chu nasa taka inhnialin an inaukhum a, CM chuan LG Saxena chu sorkar hnathawhnaah inrawlhna tura thuneihna a neih loh thu a sawi.