Eptu party tam zawkin RVM hman an duh lo

Election Commisison of India (ECI) in Remote Voting Machine (RVM) hman rawtna a siam chu epty party tam zawkin an thlawp dawn lo tih an sawi.

ECI chuan migrant voter-te tana RVM hman a rawt chungchangah nimin khan political party hrang hrangte chu meeting a neihpui a ni. Meeting-ah hian national party pariat leh recognised state party 57 a sawm. Party tinte chu January thla tawpah an ngaihdante ziaka thehlut vek turin a ngen.

Hetih lai hian all-party neih hma, Pathianni khan Congress party kaihhruaiin eptu party-te chuan meeting an nei hmasa a, he hunah hian party 16 an tel. Meeting-a tel zingah hian JDU, Shiv Sena, CPI(M), JMM, RJD, NC leh VCK te pawh an tel a, party 16 aiawhte chuan RVM hmanna tur hi a chiang tawk lo nia sawiin, an thlawp dawn lo tih an sawi.

Meeting zawha chanchinthar lakhawmtute a kawmnaah, Congress leader Digvijay Singh chuan, "Political party hrang hrangte ngaihdan kan lakkhawm hnuah, RVM hmanna tur migrant labour tih chu eng chin nge a huam leh, a awm zat engmah chiang taka sawi a nih loh avangin, RVM hman chu a felfai tawk dawn lo nia ngaiin lungrual takin ECI rawtna hi thlawp loh kan titlu a ni," a ti. January 25 hian meeting nei lehin, a hlawmin emaw a hran ṭheuh emaw in an chhanna hi an pek tur thu a sawi bawk. Meeting-naa tel lo, Samajwadi Party leh Nationalist Congress Party (NCP) pawhin eptu party joint meting thurel hi an pawm thu an sawi a ni.