Rahul Gandhi-a'n Bharat Jodo Yatra chhunzawm

Congress hruaitu Rahul Gandhi chuan Bharat Jodo Yatra a neih mek chu darkar 30 chhung a titawp lailawk hnuah, Pathianni chawhnu lam aṭang khan a chhunzawm leh. Nimin khan Jalandhar, Punjab aṭanga kal ṭanin, Hoshiarpur thleng a kal.

Kar liam ta Inrinni zing khan Jalandhar Lok Sabha Congress MP Santokh Singh Chaudhary a thih avangin, Gandhi hian Punjab-a yatra a neih mek chu a chawl lailawk a, Pathianni khan Dhaliwal Kadian-a MP Chaudhary vuinaah party hruaitu dangte nen an tel a ni.

Yatra a chhunzawm lehnaah hian nikum May thlaa kahhlum, Punjabi singer Sidhu Moosewala-a pa, Balkaur Singh pawhin Rahul Gandhi hi a ṭawiawm. Gandhi hi nikuma Moosewala kahhlum a nih hnu khan Balkaur Singh hnem tur hian an khua, Moosa-ah a lo tlawh tawh a ni.

Gandhi hian Punjab-a yatra a neih mek hi a zo hnai tawh a, January 18 hian Mukerian aṭanga Himachal Pradesh state lutin, January 19-ah Jammu and Kashmir state luh hman an tum a, January 30-ah Srinagar-ah yatra kharna hi neih a ni ang.