PM Modi-a'n Agniveer batch hmasa berte hun hmanpui

Prime minister Narendra Modi chuan short term programme, Agnipath scheme hmanga sipai atana lak thar, Agniveer batch hmasa berte chu nimin khan hun a hmanpui.

Agnipath scheme hi nikum June 14 khan sorkar laipui chuan tlangzarhin, he scheme hnuaiah hian Indian armed force-ah ṭhalai, kum 17 leh a chanve aṭanga kum 21 inkarte chu kum li ṭang tura lak an ni. Agnipath scheme hmanga sipaia lakte hi Agniveer tih an ni. Agniveer zinga 25% hi kum li term a zawh hnuah regular service-a lak chhoh theih an ni ang.

Kum li thleng chauh sipaia ṭan theihna tur scheme hi tlangzarh a nih khan ram chhung hmun hrang hrangah duhlohna lantir a ni. Hemi hnu hian sorkar laipui chuan kum 2022 atan bik, kum bithliah chunglam hi kum 23-ah a tisang.

Eptu party hrang hrangin na takin sawisel mah se, sorkar laipui chuan he scheme hi a kaltangpui chhunzawm zel a ni. Defence minister Rajnath Singh chuan Agnipath scheme chu danglamna nasa tak thlentu tur a ni tiin, hemi hmang hian Indian armed force chu khawvela a ṭha ber zingah siam chhoh an ni dawn a ni, a ti.