Joshimath khuaah in khi a awm belh leh

Uttarakhand-a Joshimath khuaa lei tlakhniamna bialah Thawhṭanni khan in 44 vel a khik belh leh a, heng zingah hian PWD rest house pawh a tel.

In khi hi 849 awm tawhin, heng zinga 165 chu danger zone-a awm an ni. Hetih lai hian lei talkhna hniama chengte chu sawnchhuah mek niin, sorkarin temporary relief centre a siamah awmtir a ni. Disaster Management Authority bulletin-in a tarlan danin, Thawhṭanni thleng khan mi 800 chuang, chhungkaw 237-a mite chu hmun him lamah sawn an ni tawh.

District thuneitute chuan lei tlahniam vanga harsatna tawk chhungkaw 396-te hnenah chhawmdawlna, Rs nuai 301.77 hu sem chhuah a ni tawh tih an sawi. Relief camp-a awmte hnenah hian foot kits 284, blanket 360, bawnghnute litre 842, heater 55 bakah an mamawh hrang hrangte sem a ni tih official chuan a sawi. Mi 637-te chu health check-up nei tawhin, an ran vulh 33-te hriselna pawh endik sak an ni bawk.

Hetih lai hian Joshimath Bachao Sangharsh Samiti chuan Thawhṭanni khan sorkar laipui hnenah ngenna thlenin, Uttarakhand sorkar chuan chhawmdawl hna a thawk ṭha tawk lo niin an sawi a, sorkar laipui chu hma la zawk turin an ngen. Prime minister Narendra Modi hnenah lehkha a thawnah, JBSS convenor Atul Sati chuan chhiatna thlen theih thu hi thla 14 chhung warning a awm tawh chungin, state sorkar chuan a ngaihsak tawk lo a, tuna harsatna an tawh mekah pawh hna a thawk muang hle niin a sawi.

Samiti chuan Joshimath-a chhiatna thlenna chhan pakhat nia an puh, NTPC Tapovan-Vishnugad hydel project thawh mek pawh tihtawp turin a ngen bawk.