Pakistan PM-in Kashmir chungchangah India nena inbiak rawt

Pakistan prime minsiter Shehbaz Sharif chuan Kashmir chungchanga India leh Pakistan inkara buaina awm chinfel dan ngaihtuahin India sorkar nena inbiak a rawt a, hemi atan hian United Arab Emirates (UAE) hruaitute chu palai hna thawk turin a ngen bawk.

Nikum April thlaa Pakistan PM atana lakluh a nih hnuah, Sharif hian India nena inbiak a rawt ṭum khatna a ni.

PM Sharif chuan India nena ṭum thum an indo tawhna aṭangin zirlai pawimawh tak Pakistan chuan a zirchhuak a ni tiin, an ṭhenawm India nena inrem taka awm an duh tawh a, hei vang hian ram pahnihten innghirnghona an neih hrang hrangte pawh chinfel vek an duh tawh tih UAE news channel, Al Arabiya-in a kawmnaah a sawi.

Sharif chuan, "India ram hruaitu leh Prime Minister hnenah chuan inbiakna dawhkan kil dunin, kan haratna hrang hrang, Kashmir chungchangte pawh chingfel turin inbia ang tih ka rawt a ni," a ti.

India leh Pakistan-in buaina an neihah boruak siamṭha turin UAE leh Saudi Arabia-te hi an che chhuak fo a, a bikin kum 2019-a Pulwama-a thihchilh bomb hmanga India sipai 40 thah an nih chungchangah pawh palai hna an thawk a ni. He pawikhawihna avang hian India leh Pakistan hi an indo hman ṭhelh a, India sipai leh sipai hmun dangte beihnaah hian Pakistan-a inkhuar, Jaish-e-Mohammed firfiak pawl chu mawhphurtuah puh an ni.