2020 March hnua hri kai hmuh chhuah tlem ber ni thleng

India ramah Thawhṭanni khan Covid-19 hri kai mi 89 hmuh chhuah an ni a, hei hi kum 2020, March 27 hnua ni khata hri kai hmuh chhuah an tlem ber ṭum a nih thu union health ministry chuan a tarlang.

Nimin zing dar 8-ah health ministry-in data a tihchhuahah, ram pumah hri kai hmuh tawh hi mi vaibelchhe 4.46 niin, an zinga 5,30,726 chuan an thihpui tawh a ni.

Nitina hri kai hmuh chhuah, daily positivity rate chu 0.05% niin, weekly positivity rate 0.09% a ni bawk. Hri kai mek, active case awm zat hi hri kai tawh aṭanga 0.01% a ni mek bawk.

Thawhṭanni khan Delhi-ah chuan kum 2020, March thla hnua a ṭum khatna atan hri kai hmuh chhuah an awm lo. State health department-in a tarlan danin, Delhi-ah hri kai mek hi 10 chauh awm tawhin, tun thla chhungin hri vanga thi hi mi pakhat chauh an la awm bawk.

Hri leng a ziaawm tawh hle chungin Kerala sorkar chuan vantlang hmun, hnathawhna leh punkhawmna hmunahte facemask hman vekna thupek hi a siam. January 12 khan state sorkar chuan thupek hi tichhuakin, pawn chhuahnaah face mask hmang vek tur leh; dawr, theater leh thiltihkhawm buatsaihnaah kut sil ṭha leh, sanitiser hmang vek turin a ti bawk. Hei bakah hian midang nena inhlata awm, social distancing pawh kalpui chhunzawm zel turin a ti a ni. He thupek hi thla khat chhung atan hman phawt tur a ni tih CM office chuan a tarlang.