Delhi-ah khaw vawh lamin 1.4 C a thleng

Delhi khawpui leh ramchhung hmarthlang lam bialah thlasik a na hle a, Thawhṭanni khan Delhi-a chuan khaw vawh lam hi 1.4 degree Celsius niin, kum 2021 January hnua a la vawh ber ṭum a ni. Nimin kha khaw vawh lam hi 2.4C a la ni.

Delhi khawpuia khua a vawh ber ni record chu kum 1935, January 16 kha niin, minus 0.6C a ni.

Punjab, Haryana, Chandigarh bakah Rajasthan leh Uttar Pradesh hmun ṭhenkhatah thli vawt a tleh avangin khaw vawt a zual hle bawk a, tiauchhum a chhah avangin thlawhtheihna leh rel service pawh eng emaw zat a bahhlah phah bawk. Chandigarh, Rajasthan leh Uttar Pradesh-ah chuan khaw vawt zual zel avangin zirlai naupang, Class 8 leh a hnuai lam tan thlasik chawlh an pawtsei.

India Meteorological Department (IMD) chuan vawiin thleng hian hmarthlang lam bial leh central India-ah thli vawt a la tleh chhunzawm dawn tih sawiin, Ningani aṭang erawh chuan khaw vawt hi ziaawm hretin, 4-5C velah a chho thei dawn niin a tarlang.