Eptuten RVM hman an duh lohna chhan an sawi

Election Commission of India (ECI) in migrant voter-te tana remote voting machine (RVM) hman a rawtna chu eptu party tam zawkin an duh lo.

RVM hman duh lohtu langsar zingah hian Congress party pawh a tel a, ECI huaihawta sawiho a nih hma pawhin Congress kaihhruaiin eptu party hrang hrang chuan an lo sawiho hmasa tawh a ni.

Congress hruaitu Digvijasya Singh chuan electronic voting machine (EVM) chungchangah sawiselna awm ṭhinte chu ECI chuan a ngaihtuah hmasak phawt a ngai a ni, a ti.

Aam Aadmi Party (AAP) hruaitu Sanjay Singh chuan RVM hman a ngaihna chhan hi zawtin, hemi hmang kher lo hian voter-ten vote thlak ṭha tura tih dan kawng dang pawh a awm a ni, tiin a sawi. He system hman a nih chuan party tenau zawkte tan harsatna a awm dawn tih sawiin, "Seat khat chauha by-election neih a ṭulna lo awm se, party tenau zawkte chuan state chhung hmun hrang hranga awm darh, migrant voter-te bula campaign kual a harsa dawn a ni," tiin a sawi.

Eptu party-te joint meeting-ah hian West Bengal-a rorellai, Trinamool Congress (TMC) chu tel ve lo mah se, party national general Abhishek Banerjee chuan RVM hman rawtna hi an thlawp loh thu ECI hi a lo hrilh tawh a ni. TMC chuan system hman rawtnaah hian model of conduct telh a ni lo tih sawiin, hei hi political party hrang hrangte chuan dik lo takin an hmang thei dawn a ni, a ti. Voting machine himna lam chungchang pawh sawilangin, an awmna constituency ni lo hmun dangah migrante voter-te chuan vote an thlakte a ngai dawn a ni, tiin a tarlang.

Jammu and Kashmir party, PDP leh National Conference pawhin J&K-a chengte chu kum tam tak vote thlak phalsak an nih loh laia, ECI-in migrant voter-te vote thlak theih dan tur a rawt chu thil mak tak a ni, an ti.