Sorkarin NGO-te enfiahtu tur statutory body din a tum

Sorkar laipui chuan NGO hrang hrangte chet dan enfiah a, financial grant an dawnte dik lo taka pawhpen a ni em tih leh, an pawl hnathawh tur chin bakah an che em tihte enfiah turin statutory body din a tum.

Legal body, 'charity commissioner' hian NGO, abikin Foreign Contribution Regulations Act (FCRA) hnuaia in register lote hnathawh dan hrang hrangte an enfiah ṭhin ang. NGO ṭhenkhat, an pawl hmalakna huam chin baka thawk ṭhin an awm nia sawi a nih avangin he body hi sorkar chuan din a tum ta nia sawi a ni.

India ramah hian FCRA hnuaia NGO register-te chu ministry of home affairs-in division hrang hrang kaltlangin a enfiah ṭhin. Hetih lai hian FCRA hnuaia register loh NGO hi nuai 35 dawn an awm a, hengte hi dan hrang hrang 40 vel hnuaiah an awm mek a, heng NGO-te hian dan an palzut fo niin an sawi.

Sorkar official chuan NGO-te hi khawtlang hmasawnna kawngah pawimawh tak an nih rualin, tam tak chuan sum an dawn dante dik tawk loin, pawl eng emaw zat chu India ram tana pawi tur zawnga chete pawh an awm a ni, a ti.

A bikin Covid-19 hri len hluar lai khan chhawmdawlna atana hman tura an sum dawnte chu NGO ṭhenkhat chuan thil dangah an pawtpeng nasa nia sawi a ni. Hei bakah hian NGO tam takin foreign fund an dawnte chu al Qaida leh LeT firfiak pawl nena inzawmna neite an lo ni bawk tiin an sawi. Loneitute nawrh huaihawt thlawptu pawl ṭhenkhat pawhin pro-Khalistan organisation aṭangtein sumte an dawng bawk. Hei vang hian an sum dawn dan leh sum petute, pawlin sum an hmanna te pawh uluk taka enfiah a ngai a ni, tiin sorkar official chuan a tarlang.