Tamil Nadu Governor-in rorellai DMK hruaitu a khing

Tamil Nadu governor RN RAvi chuan rorellai, DMP party hruaitu suspend mek chu a thusawi chungchang avangin a laka tihhmingchhiat tuma puhna, defamation case a thehlut.

Governor Ravi hian Nilaini khan Chennai court-ah DMK hruaitu, Sivaji Krishnamurthy lakah thubuai hi a thehlut a ni.

Sivaji Krishnamurthy hian tun thla tir lama state assembly rorel inkhawma Governor-in thu a sawinaah, sorkarin a thusawi tura a lo duan ṭhenkhat a sawilan duh loh vangin, Governor lakah hian ṭawngkam mawi lo tak hmangin, Ambedkar hming a ngaithei lo a nih chuan Kashmir-ah Governor chu kal sela, firfiakten an lo kaphlum mai dawn a ni, tiin a sawi.

Krishnamurthu chuan, "Ram danpui hming chhalin rinawmna thu i tiam a ni lawm ni? A ziaktu kha Ambedkar a ni. A hming hi i sawi duh lo a nih chuan Kashmir-ah kal mai rawh. Keimahni ngei hian firfiakte kan tir zui ang a, a han kaphlum mai dawn a ni," tiin an party punkhawmnaah a sawi.

Ṭawngkam mawi lo tak leh, thu dengkhawng tak a sawi hnuah, DMK chuan Krishnamurthy chu party kalphung bawhchhia leh party hming tichhiaah puhin kar liam ta khan an lo suspend tawh a ni.

Tamil Nadu-a rorellai, DMK sorkar leh Governor hi tun hnaiah an innghirngho fo a, DMK hian BJP duh dan leh an thu thua awmah Governor hi an puh. Governor hian January 9-a assembly-a thu a sawi ṭum khan, state sorkarin official speech atana a lo pawm tawh zinga thu eng emaw zat chu a sawilang duh lo. Heng zingah hian securlarism chungchang bakah, hruaitu Periyar, BR Ambedkar, K Kamaraj, CN Annadurai leh Karunanithi-te chanchin an ziah chu a sawi duh lo a ni. RN Ravi hian thu a sawi zawh veleh national anthem sak hun pawh nghak loin a kalsawn nghal a ni.

Governor chetdan hian Tamil Nadu sorkar a ti thinur hle a, chief minister MK Stalin chuan Assembly kalphung a ni lo tiin, president Droupadi Murmu hnenah pawh inrawlh a, Ravi chu Constitution zah leh zawm tura hriattir turin a ngen.