Uttarakhand sorkarin Joshimath-a chengte sawnna tur puang

Uttarakhand sorkar chuan Joshimath khuaa lei tlakhniamna biala cheng, chhungkaw 120 chuang sawnchhuah ngaite chu a thawh khatnaah km 36-a hla, Pipalkoti-ah sawn an ni dawn tih a puang.

State disaster management secretary Ranjit Sinha chuan Chamoli district thuneitute chuan Joshimath aṭanga sawnchhuah ngaite awmna tur hian hmun pali an thlang tih a sawi. An thlan zingah hian Pipalkoti bakah Dhak leh Gaunk Selang khua leh, horticulture land an tel.

Sinha chuan Pipalkoti hi an enfiah tawh thu sawiin, sea level aṭanga meter 1,260 vel a ni a, ram hectare hnih vela zau niin awmna tur atan hian a ṭha tawk nia an ngaih thu a sawi. "Pipalkoti-ah hian chhungkaw sawnchhuah ngaite hi dah vek sen an ni dawn a, mahse chhungkaw 120-125 vel erawh an awm thei dawn a ni. Hmun dangte pawh enfiah chhunzawm zel tum a ni," a ti.

Joshimath-a lei tlakhniamna hmun aṭanga sawnchhuahte chu relief camp, hotel leh homestay-ahte an la khawsa mek a ni. Joshimath-ah in 849 a khi tawh a, mahse henga chengte tam zawk chu sawnchhuah an la ni lo. District thuneitute chuan in chim hlauhawm zual 180-te chu relief camp-ah emaw, hmun dangah emaw insawnchhuah thuai tura hrilhin, thla ruk chhung chu sorkar lam aṭangin puihna, thla tin Rs 4,000 pek an ni dawn tih a hrilh. Lei tlakhniamna bial aṭang hian Nilaini thleng khan chhungkaw 258 chu an insawnchhuak tawh a ni.