Bharat Jodo Yatra-in Jammu & Kashmir a lut

Congress party hruaitu, Rahul Gandhi hoa Bharat Jodo Yatra neih mek chuan Ningani khan Punjab aṭangin Jammu and Kashmir an lut ta.

J&K hi yatra tawpna tur a ni tawh a, January 26-ah Srinagar lutin, January 30 hian yatra kharna hi neih a ni ang.

Kum 52 mi, Rahul Gandhi hian September 7 khah Kanyakumari, Tamil Nadu aṭangin Bharat Jodo Yatra hi a ṭan a, nimin kha ni 125 a kalna niin km 3,400 chuang a kal tawh bawk. Gandhi hian yatra a kal chhung hian thawmhnawm mawlmang tak inbelin, thlasik thlen hnuah pawh thawmhnaw lum inbel loin t-shirt chauh a ha reng a, hei hian sawizui pawh a hlawh hle. Mahse Ningani khan Jammu khawvawt tak an luh hnuah, yatra a neih aṭanga a ṭum khatna atan Gandhi hian jacket a ha ve ta a ni.

Gandhi hi Congress party hruaituten an lo hmuak a, National Conference president leh Kashmir leader Farooq Abdullah pawhin a lo hmuak a ni. Yatra hi nimin zing dar 7 khan border district, Hatli Morh aṭangin an ṭan leh a, mahse khawchhiat avangin darkar 1 chuang an chawl lailawk.

Yatra final leg-ah hian Gandhi chu J&K-a Congress hruaitu hrang hrangten an ṭawiawm a, Shiv Sena hruaitu Sanjay Raut pawh a kal ve bawk. Nimin khan km 25-a thui kalin, Kathua district-a Chadwal-ah zan an riak. Vawiin hian an chawl dawn bawk a ni.

Congress party chuan Bharat Jodo Yatra hi a zawh dawn hnaih tawh avangin mipui a tam thei ang tel turin an sawm. Party president Mallikarjun Kharge chuan, "Rahul Gandhi hi September 7 aṭang khan kal ṭanin, a kal tawpna tur a thleng hnai tawh a ni. He ram hi kan vaia ta a ni a, mahse kan Constitution leh democracy-te chu dinhmun derthawng takah an awm mek a ni. Bharat Jodo Yatra hian mipute thlawp a hlawh ṭha hle a, he yatra kaltlang hian mi nuai telte nen inthlunzawmna ṭha tak kan nei a ni," a ti.

January 30-a Srinagar-a yatra kharna neih a nih hnuah, Congress general secretary Priyanka Gandhi Vadra chuan ‘Hath Se Hath Jodo’ campaign a ṭan ve nghal dawn a ni. He campaign hi a thawh khatnaah village leh block level-ah kalpui a ni dawn a, a hnuah district level leh state level-a kalpui chhunzawm a ni ang.