PM-in mi 71,000-te appointment letter sem

Prime minister Narendra Modi chuan Ningani khan video-conferencing kaltlangin sorkar department hrang hranga thawktu lak thar, mi 71,000-te hnenah appointment letter a sem.

Sorkar laipuiin mi nuai 10 tana hna lak runpui siamna tur, 'Rozgar Mela' drive a siam hnuaiah appointment letter hi sem a ni. Hei hi kumin Rozgar Mela neih hmasa ber a ni tih Prime Minister chuan sawiin, hnathawktu lak thar leh an chhungte chu a lawmpui thu a sawi. Appointment letter hi sem chhuah chhunzawm leh thuai a ni dawn tih a sawi bawk.

Modi chuan NDA sorkar hnuaiah Rozgar Mela neih a ni fo tawh tih sawiin, hei hi sorkar inrelbawlna ṭhatzia lantirna a ni tih a sawi. "Kan thutiamte hlen tura kan inpekzia tilangtu a ni," a ti.

Hna lak chungchanga dik tak leh langtlang taka kalpui a pawimawhzia Prime Minister chuan a sawi a, hei hian ṭhalaite rilruah inrintawkna a pe a, dik taka kalpui a nih inringtawk takin an inbuatsaih theih phah ṭhin a ni, a ti. Hnathawktu lak tharte hnenah chuan sorkar hna chu 'job' ni loin, mipuite rawngbawlna 'service' a nih tih a hrilh a, an hnathawhnaah mipuite chu an dik zawk zel a ni tih an thupui ber a nih thu sawiin, hemi hmang hian mipuite nena inkar boruak ṭha tak a siam thei tih a sawi.

Prime Minister-in appointment letter a semte hi sorkar lapui hnuaia department hrang hranga thawktu lak thar - junior engineer, loco pilot, technician, inspector, sub inspector, constable, stenographer, junior accountant, grameen dak sevak, Income Tax inspector, teacher, nurse, doctor leh social security officer-te an ni.