J&K-ah darkar 24 chhungin vawi 3 bomb puak Bharat Jodo Yatra kal chhunzawm zel dawn

Congress hruaitu Rahul Gandhi kaihhruaia Bharat Jodo Yatra neih mekin Jammu and Kashmir an luh hnuah, darkar 24 chhungin ṭum thum bomb a puak.

Inrinni khan Jammu-a Narwal area-ah ṭum hnih bomb a puak a, mi pakua an hliam. Bomb hi minute 20 inkar hlatah tihpuah a ni. Inrinni zanlaiah Jammu-a Bajalta hmunah bomb pathumna tihpuah a ni leh a, police constable pakhat a hliam a ni.

Jammu and Kashmir-a political party hrang hrangte chuan pawikhawihna thleng chu an dem thu sawiin, hliam tuar chhungte an tawrhpui thu leh an dam ṭhat leh thuai an duhsak thu an sawi. J&K lieutenant governor Manoj Sinha chuan bomb puaka hliam tuarte chu Rs 50,000 ṭheuh pek an nih tur thu a sawi.

National Investigation Agency (NIA) special team chuan nimin khan bomb vawi hnih puahna, Narwal area thlengin, bomb tihpuahna hmunte an enfiah nghal a ni. Police-te chuan repair shop-a SUV ding lai leh, a bul junkyard-a motor pakhat ding aṭangin bomb hi tipuah niin an sawi. Indian Army senior official-te pawhin bomb puahna hmun hi tlawhin an enfiah bawk.

Bharat Jodo Yatra-in J&K a luh avang leh, Republic Day lawmna tura inbuatsaihna avanga venhimna lam pawh uluk taka kalpui an nih laiin bomb hi tihpuah a ni. He thil thleng vang hian nimin khan security dinhmunte thlirin Rajouri district-ah joint intelligence and security conference neih a ni. Meeting hi General Officer Commanding (Ace of Spades Division) Maj Gen YS Ahlawat leh General Officer Commanding (Romeo Force) Maj Gen Trivedi-ten an kaihruai a ni.

Bharat Jodo Yatra kal chhunzawm

Hetih lai hian Bharat Jodo Yatra chuan Jammu and Kashmir-a Kathua hmun an thleng tawh a, Congress general secretary KC Venugopal chuan yatra chu ruahman lawk angin kal chhunzawm zel a ni dawn tih a sawi a, venhimna lam chu security mi leh sate mawhphurhna a ni, a ti.

Rahul Gandhi hoin nimin zing khan Kathua aṭangin an kal leh ṭan a, J&K Congress president Vikar Rasool Wani, president hlui Ghulam Ahmed Mir, spokesperson Ravinder Sharma leh hruaitu dang eng emaw zatin an ṭawiawm. Nimin bik khan km 25 kalin, Chak Nanak-ah zan an riak. Vawiin hian kal chhunzawm lehin Samba district-a Vijaypur an thleng ang.

Official-te chuan yatra hi boruak muanawm tak hnuaia neih a nih theihna turin venhimna lam pawh uluk taka ruahman niin, venhim hna thawk tur pawh ṭhahnem tak dah an ni, an ti. September 7 aṭanga ṭan, Bharat Jodo Yatra hi a zo hnai tawh a, January 30 hian Srinagar-ah kharna hun hman a ni tawh ang.