
Andaman & Nicobar-a thliarkar 21-te hming Param Vir Chakra awardee-te hming chawiin phuah
Prime minister Narendra Modi chuan Andaman & Nicobar-a thliarkar hming la nei lo 21-te chu huaisen chawimawina lo dawng tawh, Param Vir Chakra awardee-te hmingchawiin a phuah.
Nimina Parakram Diwas pualin Prime Minister chuan thliarkar 21-te hming phuah hi a puang a ni.
Andaman & Nicobar-a thliakar hming la nei lo zinga a lian ber chu Param Vik Chakra awardee hmasa ber, kum 1947 November 7-a Srinagar Airport bula Pakistan firfiakte nen an inbeihnaa thi, Major Somnath Sharma hming puttir a ni. Ani bakah thliarkar 20 dang chu Subedar and Hon. Captain Karam Singh, MM; 2nd Lt. Rama Raghoba Rane; Nayak Jadunath Singh; Company Havildar Major Piru Singh; Capt GS Salaria; Lieutenant Colonel Dhan Singh Thapa; Subedar Joginder Singh; Major Shaitan Singh; CQMH. Abdul Hamid; Lt Col Ardeshir Burzorji Tarapore; Lance Naik Albert Ekka; Major Hoshiar Singh; 2nd Lt. Arun Khetrapal; Flying Officer Nirmaljit Singh Sekhon; Major Ramaswamy Parameswaran; Naib Subedar Bana Singh; Captain Vikram Batra; Lt Manoj Kumar Pandey; Subedar Major Sanjay Kumar; leh Subedar Major Retd (Hony Captain) Grenadier Yogendra Singh Yadav-te hming phuah an ni tih Prime Minister Office chuan a tarlang.
PMO chuan ram tana inpe, pasalṭhate chu prime minister Narendra Modi chuan a ngaihlu takzet a, heng mite zahna leh hriatrengna atan thliarkar hming la nei lo 21-te chu an hming chawitir hi rel a ni ta a ni, a ti. Heng thliarkar hming phuah thar zinga 16-te chu North leh Middle Andaman district-a awm niin, panga chu South Andaman lama awm an ni.
PM hian Ross Islands tia hriat ṭhin, Netaji Subhas Chandra Bose Dweep-a Nejati puala National Memorial din chu a hawng nghal bawk. He hun hi union home minister Amit Shah pawhin a hmanpui a ni. Sorkar laipui chuan kum 2021 khan Netaji Subhas Chandra Bose-a piancham, January 23 chu Parakram Diwas-ah a lo puang tawh a ni.
Netaji Bose piancham pual hian nimin khan PM Modi leh Lok Sabha leh Rajya Sabha-a party hruaitute chuan Parliament House Central Hall-a a thlalak hmaah zahna pangpar an dah bawk. Central Hall-a a thlalak tar hi kum 1978, January 23 khan khatih laia India president N Sajiva Reddy chuan a hawng a ni.