Indian Navy kutah INS Vagir hlan

Kalvari class submarine, INS Vagir chu nimin khan Mumbai-a lawngchawlh hmunah India Navy kuta hlan a ni.

Chief of Naval Staff admiral R Hari Kumar kuta INS Vagir hlan hi ṭum eng emaw zat enfiah tawhin, sea trial-te pawh neihpui a ni tawh tih defence ministry chuan a tarlang. Admiral Kumar chuan Vagir chu thla 24 chhunga Indian Navy kuta submarine hlan pathumna a nih thu a sawi.

Kalvari class submarine-te hi Mazagon Dock Shipbuilders Limited (MDL) Mumbai-in Naval Group, France nen thawkduna India rama an siam an ni. Vagir-te hian mission hrang hrang - anti-surface warfare, anti-submarine warfare, intelligence gathering, mine laying leh surveillance mission an kalpui thei a ni.