Pharmacist nuai 12.5-te training pe dawn

Ram chhungah, a bikin rural area-ah doctor leh nurse-te awm mumal loh avanga vaccine pekna kawnga harsatna awm ṭhin tihziawmna turin, Indian Pharmaceutical Association (IPA) chuan pharmacist-te chu training pek an tum.

IPA chuan pharmacist-te chu vaccine pe thei, 'vaccinator' an nih theihna turin May thla aṭangin training pek an tum tih a sawi. Ram chhunga pharmacist in register, mi nuai 12.5-te chu kum 2025-ah vaccinator hna an thawh theihna turin training pek vek a tum a ni.

Training hi May thla aṭangin ṭan a ni dawn a, ni 15 chhung online training pein, ni 15 dang chu registered hospital-ah offline training an nei leh ang. IPA leh World Health Organisation chuan training chhuakte hnenah certificate hi a pe dawn a ni.

IPA president Prof TV Naryana chuan pharmacist-te training pekna tura rawtna an siam hi sorkar laipui pawhin a pawmpui tawh niin a sawi a, ram changkang zawk US leh UK-ah pawh he ruahmanna hi an hmang vek a ni, a ti.