FM-in agriculture sector tana ruahmanna puang

Union finance minister Nirmala Sitharaman chuan nimin tlai dar 4 khan press conference nei lehin, prime minister Narendra Modi-a'n a lo puan tawh, economic package cheng vaibelchhe nuai 20 hmanna tur dangte a sawibelh leh. 

Hri leng vanga harsatna hrang hrang tawkte chhawk zangkhaina tura PM-in financial package siam a nih thu a puan hnuah, finance minister hian package hmanna tur kimchang puangin a zawnin ni thum chu press conference a nei tawh a ni. 

Nimina press conference-ah hian minister chuan  agriculture leh a kaihhnawih dangte tana sorkar hmalakna turte a puang. India ram mipui tam ber chu agriculture leh a kaihhnawiha innghat an ni tih sawiin, heng zingah hian small leh medium farmer an tam ber a ni, a ti. 

Farmgate infrastructure - cold storage facility, foodgrain storage centre leh a dangte thuam ṭhatna turin Rs vbc nuai khat fund dah a ni dawn. Hei hi primary agriculture society, aggregator, start-up te bakah agricultural startup ten an chhawr thei dawn a, ram pawn lama thil thawnchhuahna kawngah pawh a pui ang. He fund hi a rang thei anga bera siam a ni ang. 

Micro-food enterprise dinna turin Rs vbc 10,000 dah a ni dawn. He scheme hian micro-food enterprise nuai hnih vel a pui thei dawn a, a dinna tur hian cluster-based approach hman a ni ang. 

Fisheries tan Rs vbc 20,000 ruahman a ni. He scheme hnuaiah hian marine, inland fishery lehaquaculture tan Rs vbc 11,000 dah a ni a, infrastructure - fishing harbour, cold chain leh fish market siamna atan Rs vbc 9,000 dah a ni bawk. 

Dairy sector tan animal hubandry infra development fund-ah Rs vbc 15,000 dah a ni. 

Damdawi lam siamna, herbal cultivation atan Rs vbc 4,000 dah a ni. Medicinal plant chinna ram hectare 10 a huam dawn a, Ganga lui kam tawnah corridor siam a ni ang. Hei hi National Medicinal Plants Board (NMPB) enpuina hnuaiah kalpui a ni ang. 

Beekeeping lama hman turin Rs vbc 500 ruahman a ni. Cross pollination atana pawimawh leh khawizu tam zawk thar chhuah a nih theihna turin beekeeping hi ngaih pawimawh a ni. 

Supply chain ṭha zawk siamna tur atan Rs vbc 500 dah a ni. Tomato, purusen leh alu tan bika subsidy siam chu thlai leh thei dang zawng zawng huam tel tir a ni tawh dawn.

Transportation-ah 50% subsidy leh storage-ah 50% subsidy siam a ni. Hei hi thla ruk chhung kalpui niin, a ṭul dan angin pawhsei theih a ni ang. 

Sorkar laipui chuan loneitute hmakhua ngaiin Essential Commodities Act, 1955 siamṭhat a tum tih minister chuan a sawi. Agriculture food stuff - cereal, oilseed, purunsen, alu leh tel ei chi bika khuahkhirhna siamte tihtawp tum a ni, a ti. Hei bakah hian loneitute tan inter-state trade kalpuina turin dan siam tum a ni tih a sawi a, an thlai thar chhuahte a ngam sang apiang hnenah an hralh theina turin a pui thei dawn a, sum tam zawk an lakluh theih phah dawn a ni. Loneituten an thlai thar hralh chhuahna tur man zat an hriat theihna turin Agricultural Produce Price Support Program siam a ni dawn bawk a ni.