Hri kai dam tam ber ni a thleng Amit Shah-a'n Covid-19 a kai

Ministry of Health and Family Welfare-in nimina report an tihchhuahah chuan Covid-19 kai, darkar 24 chhunga dama puan mi 51,255 an awm a, hei hi hri len ṭantirh aṭanga darkar 24 chhunga dama puan tam ber ṭum a ni. 

India ramah hian hri kai enkawl dam tawh 11,45,629 lai an awm tawh a, hri kai mek 5,67,730 an la awm bawk. Thihpui mi 853 lai awm lehin mi 37,364-in an thihpui tawh. Hri kai hmuhchhuah thar pawh an la tam hle a, nimin khan mi 54,735 chuan hri an kai tih hmuh chhuah a ni leh bawk a, hei nen hian ramchhung hmun hrang hrangah hri kai mi 17,50,723 an awm tling tawh. Enkawl dam tawh rate hi 65.43% a tling tawh a, thihpui rate hi 2.13% a ni thung.

Indian Council of Medical Research (ICMR) chuan darkar 24 chhungin Covid-19 sample 4,63,172 an enfiah leh tih sawiin, hri len ṭantirh aṭanga nimin thleng khan sample 1,98,21,831 an enfiah tawh. Tunah hian sample test-na atana pawmpui laboratory 1,344 an nei tawh a, heng zinga 913 hi sorkar laboratory niin 431 hi chu private laboratory a ni thung. 

Union home minister Amit Shah chuan Covid-19 a kai tih nimin khan hriat a ni a, damdawi-inah enkawl tura dah  nghal a ni. Amit Shah chuan a twitter-ah hri a kai thu hi sawiin, a ngaihtuahawm lo a, mahse doctor-te thurawn angin damdawi-inah a lut tih a sawi. Tun hnaivaia contact a lo neihte chu inkhung hrang a, an sample test tir  nghal turin a ngen bawk.

India rama Covid-19 kai tamna ber Maharashtra-ah chuan nimin khan hri kai hmuh chhuah thar mi 9,601 an awm leh a, hei nen hian hri kai mi 4,31,719 an awm tawh a ni. Hetihlai hian enkawl dam mi 2,66,883 awm tawhin 1,49,520 lai chuan hri an la kai a, 15,316-in an thihpui tawh.

Tamil Nadu-ah chuan hri kai 2,51,738 an awm tawh a, enkawl dam 1,90,966 amw tawhin mi 4,034-in an thihpui tawh a, hri kai mek 56,738 an la awm.

Hri kai tam lama State/UT pathumna ni ṭhin Delhi-ah aiin Andhra Pradesh-ah hri kai an tam tawh zawk. AP-ah hian hri kai 1,50,209 awm tawhin nimin khan mi 9,276-in hri an kai tih hmuh chhuah a ni leh a, enkawl dam 76,614 awm tawhin mi 72,188-in hri an la kai mek.

Hetihlai hian Delhi-ah erawh hri kai hmuh chhuah 1,118 chauh an awm tawh a (thla hmasa lama an dinhmun nena khaikhin chuan a hniam tawh hle), nimin thleng khan mi 1,36,716-in hri kai tawh mah se enkawl dam an tam tawh a, hri kai mek 10,596 la awmin, enkawl dam rate sanna ber State/UT an ni.

Delhi-ah hian hri len ṭantirh khan hri kai an pung chak hle a, kai tam lamah India rama pahnihnate pawh an ni hial, mahse tunah chuan an dinhmun hi a ṭha sawt hle a ni.

4     Maharashtra hi Covid-19 thihpui tam ber State an ni a, Tamil Nadu chuan dawtin Delhi chu thihpui tam state /UT pathumna an ni. 

4    Mizoram leh Lakshadweep chauhin India ram state/UT zingah hri vanga thi an la nei lo. 

4    Lakshadweep chiah hi Covid-19 case la nei lo awmchhun an ni.