World Bank-in India tan USD vbc 1 pe dawn

World Bank chuan India khawpui hrang hranga mi rethei zawkte leh nitina inhlawhfa ṭhinten Covid-19 avanga harsatna an tawh tihziaawm a nih theih nan, social security technology fund-ah US dollar vaibelchhe 1 pek a remti.

Hri leng vang hian India ramah mi rethei zawkte leh migrant worker-te chuan harsatna an tawk chho mek a, World Bank chuan heng mite hi a pui dawn a ni. He ṭanpuina kaltlang hian mi rethei zawkte leh migrant worker-te tana sorkar laipuiin security a siamsak, 400-plus social security scheme tihchangtlun tum a ni.

World Bank Director for India, Junaid Ahmad chuan World Bank leh India sorkar chu health, social protection leh Micro, Small & Medium Enterprises (MSME) lamah an thawhdun mek thu sawiin, ram chhunga mi rethei zawkte leh migrant worker-te tana World Bank-in ṭanpuina a pe tur chu lawmawm a tih thu a sawi bawk.

India health sector-ah World Bank chuan a hmain Covid-19 do nan hian ṭanpuina pawisa, US dollar vbc 1 a lo pe tawh bawk a ni. Covid-19 avanga World Bank-in India a ṭanpuina hi a vaiin US dollar vbc 2 a tling tawh a ni.