Rahul-a'n surgical strike chungchanga Digvijaya Singh thusawi ṭawmpui lo

Congress party hruaitu, Rahul Gandhi chuan kum 2019-a India-in surgical strike a neih chungchangah an party senior leader, Digvijaya Singh thusawi chu a ṭawmpui lo tih a sawi.

Nimina Jammu-a press conference a neihah Rahul chuan hemi chungchang hi sawifiahin, "Digvijaya Singh ngaihdan hi kan ṭawmpui lo," tiin Digvijaya Singh thlir dan chu party thlir dan a ni lo tih a sawi. 'Sipaite chuan an hna an thawk ṭha hle a, an hnathawh ṭhatzia finfiahna hi an pek chhuah kher a ngai lo," a ti.

Congress senior leader, Digvijaya Singh hian Thawhṭannia Bharat Jodo Yatra neihnaa thu a sawiah, sorkar laipui chuan Pakistan ramah surgical strike a nei ngei tih finfiahna tur engmah a tarlang lo a, sorkar chu dawt sawiah a puh.

Singh chuan, "Pulwama chu firfiakte chettlatna fo niin, car-te pawh uluk taka enfiah an ni ṭhin. Mahse wrong side lama tlan Scorpio car chu enfiah a ni lo a, hei hi engnge a chhan? A hnuah motor insu in, kan sipai 40-te an thi a ni. Vawiin thlengin sorkar laipui chuan Parliament-ah emaw, mipuite hnenah emaw engmah information a la tichhuak lo," tiin a sawi.

"Sorkar chuan surgical strike chungchang a sawi fo a, mi tam tak thah an ni tihte. Mahse finfiahna a awm lo. Dawt thu hmangin ro an rel mai mai a ni,"tiin a sawi zui.

Surgical strike chungchanga Singh thusawi hi party dang, a bikin BJP chuan na takin an sawisel a, Congress party beihna atan an hmang zui bawk. Eptu party-te chu prime minister Narendra Modi an huat avangin an mit a del zo nia sawiin, Singh thusawi chu armed force-te hmusitnaa an ngaih thu an tarlang.