March 2020 hnua a ṭum khatna atan Kar khat chhunga hri kai thar 1,000 tling lo

India ramah Covid-19 hri leng a ziaawm zel a, kar liam ta chhung khan hri kai thar 87 awmin, kum 2020 March thla hnua kar khata hri kai thar an tlem ber ṭum a ni.

Kar hnih chhung chu kar khatah hripui vanga thi mi 10 hnuai lamah ve ve an awm bawk. January 9-15 chhung khan hri vanga thi mi pali awmin, January 16-22 chhungin mi pariat an awm bawk a ni.

Thawhṭanni khan Covid-19 hri kai hmuh chhuah thar 89 awmin, Pathianni khan 94 an awm. Nimin thleng khan ram pumah hri kai mek, active case chu 1,931-ah a tlahiam tawh a ni.

Union health ministry data-a a lan danin, India rama hri kai hmuh chhuah tawh hi vaibelchhe 4.46 an awm tawh a, an zinga 5,30,737 in an thihpui tawh a ni. Hri vanga thi hi hri kai tawh aṭangin 1.19% an ni.

Nitina hri kai hmuh chhuah, daily positivity rate chu 0.06% niin, kar khata hmuh chhuah chu 0.08% a ni.

Covid vaccine hi dose vaibelchhe 220.30 pek chhuah a ni tawh bawk.

Hri leng ziaawm chho zel mah se, INSACOG chuan department of biotechnology (DBT) enpuina hnuaiah ram chhunga Covid-19 hri leng dinhmun chu uluk takin a thlithlai reng a, variant thar a awm leh awm loh fiahna turin constant genome sequencing pawh tih reng a ni.