Bawng ek hmanga in sakte atomic radiation lakah a him : Gujarat court

Gujarat-a Tapi district-a session court chuan India ramah bawng humhalh a ṭul thu sawiin, 'Bawng ek hmanga in sakte chu atomic radiation lakah a him a ni tih science hmanga finfiah a ni," a ti.

Bawng zun pawhin natna hrang hrang a tidam thei a ni tiin, Tapi district sessions judge Samir Vyas chuan nikum November thlaa Gujarat aṭanga Maharashtra-a dan kalha bawng leh sial phurluttu, kum 22 mi chungthu a ngaihtuahnaah a sawi. Bawng tawlhtu hi thiam loh chantirin dam chhung tang turin hrem a ni. Court thutlukna siam hi tun hnaia tihchhuah a ni chauh a ni.

Judge chuan court thupek a tihchhuahnaah, bawng talh a ni ṭhin chu a lawm loh thu sawiin, bawng chu ransa a ni mai lo a, 'kan nu ber' a ni, a ti. "Khawvela harsatna zawng zawngte hi bawng thisen chhuah ṭhin tihtawp a nih rualin chinfel a ni ang. Bawng humhalh chungchang kan sawi reng chungin, a taka kalpui a ni lo. Bawng talh leh, dan loa tawlh ṭhin pawh a la thleng reng a ni, hei hi civilised society-a thil thleng atan chuan a zahthlak hle a ni," tiin a sawi.

"Bawng hi sakhaw symbol a ni," tiin judge chuan ram chhung bawngte dinhmun chu a him tawh lo a, bawng awm zat pawh an tlahniam nasa tih a sawi.

Gujarat sorkar hian kum 2017 khan bawng talh khapna dan khauh tak, Gujarat Animal Preservation (Amendment) Act, 2017' siamin, he dan hnuaiah bawng talh emaw, bawng talhnaa inhnamhnawihna nei emaw thiam loh chantirte chu dam chhung lung-in tantir theih an ni. Pawisa pawh tam tham tak chawitir theih an ni bawk.