Covid 19: India dinhmun tlangpui

Health and Family Welfare Ministry chuan nimin thleng khan coronavirus kai 27,920 enkawl dam an ni tawh tih sawiin, dam chhuak leh rate hi 34.06% a ni tawh tih an sawi.

Nimina thuchhuah an siam hma darkar 24 chhung khan hri kai zinga mi 685 enkawl dam an ni a, hetihlai hian hri kai thar 3,967 an awm thung. India ram pumah Covid-19 kai hi  81,970 awm tawhin mi 2,649-in an thihpui tawh a ni. Hri kai enkawl mi 51,401 an awm mek bawk. 

Maharastra sorkar chuan an state chhunga hotspot area Mumbai, Pune, Malegaon, Aurangabad leh Solapur-ah May 31 thleng lockdown a pawtsei dawn tih a tarlang.

Chief minister Uddhav Thackeray hoin Covid-19 vanga inkharkhip (lockdown) chungchangah meeting neih a ni a, he hunah hian deputy chief minister Ajit Pawar, water resources minister Jayant Patil, urban development minister Eknath Shinde, industries minister Subhash Desai, revenue minister Balasaheb Thorat leh PWD minister Ashok Chavan-te pawh an tel a ni.

Maharastra hi India rama state zingah chuan Covid-19 hri kai tamna ber a ni a, nimin thleng khan hri kai hi mi 27,524 an awm a, heng zinga enkawl dam tawh hi mi 6,059 niin, he hri vanga thi hi mi 1,019 an awm a, India ram state zinga thi tamna ber a ni bawk.

Sorkar laipui chuan hmun danga tangkhang, special train hmanga state lama hruai hawte chu rel station aṭanga an khaw lama an hawna tur atan special bus an hman a phalsak. 

Union home secretary Ajay Bhalla chuan state leh Union Territory sorkar tinte hnenah lehkha thawnin, hmun tam zawkah public leh personal transport-te tlan tir phal loh a la nih avangin an khaw lam panna tura rel staton aṭanga special bus an hman phalsak turin a ti a ni.