BBC-in kum 2202-a Gujarat intualvuakna thleng leh hetih laia Gujarat chief minister, prime minister Narendra Modi inhnamhnawih dan chungchang documentary a siam, 'India: The Modi Question' chu BJP leh sorkar laipuiin na taka sawiselin, sorkar chuan online link-te a lo block sak tawh a ni. 
BJP kaihhruaiin BBC documentary online link-te a block hi zirlai ṭhenkhat leh free-speech activist-te chuan an sawisel thung a, university ṭhenkhatah pawh he documentary hi zirlaite chuan an enlui tho a, buainate pawh a chhuah phah a ni. 
Delhi-a Jawarhalal Nehru University-ah Thawhlehni khan zirlai ṭhenkhat chuan BBC documentary hi tihchhuah an tum a, mahse an tihchhuah hmain power supply leh internet tihtawp sak an ni. An phone aṭanga he documentary lo ente chu BJP zirlai pawl nia sawi, ABVP member-ten lungin an tawng zui bawk. 
Students Union hruaitu hlui, N Sai Bajali chuan buaina lian zawk a chhuah venthawn thilah leh, zirlai himna turin power supply tihtawp a nih hnuah main gate bulah an awmkhawm thu a sawi. Police-te hnena ngenna an siam pawhin an ngaihsak lo niin a tarlang. Zirlai ṭhenkhat chuan power supply tihtawp chungchangah university thuneitute chu mawhphurtuah an puh. 
Hetih lai hian JNU thuneitu lam chuan sorkar laipuiin he documentary hi online sharing a khap tawh avangin, campus chhungah screening neih an remti lo tih an sawi. A tichhuak lui chungah disciplinary action lak a ni ang, an ti. 
Thawhlehni vek khan Hyderabad University-ah zirlai ṭhenkhatin documentary hi an lo tichhuak bawk a, university thuneitute chuan hemi chungchangah hian report thehlut nghal turin official-te a hriattir.
BBC-in documentary a tihchhuah hnuah, kar liam ta khan sorkar laipui chuan Twitter leh YouTube hnenah documentary link-te chu paih vek turin a lo ngen tawh a ni. Foreign ministry chuan he documentary-a an tarlan hi rintlak tawk lo, leh colonial mindset an la neih zia tilangtu a ni, a ti.