Cheetah lakluhna turin India leh SAfrica-in inremna ziak

South Africa aṭanga India rama cheetah lakluhna turin ram pahnih environment minister-te chuan inremna an ziak.

India hian South Africa aṭang hian cheetah 12 lakluh a tum a, mahse a lakluh dan tura buaipui tur a tam avangin March thla chawlhkar hmasa bera an tihfel theih chauh beisei a ni. Heng cheetah 12-te hi Madhya Pradesh-a Kuno national park-ah dah an ni ang.

Hei hi India rama a ruala Cheetah lakluh ṭum hnihna tur a ni dawn a, a ṭum khatna chu nikum September 17, prime minister Narendra Modi pianchamphak ni khan lakluh niin, Kuno National park-ah dah an ni. Namibia aṭanga cheetah lakluhte hi pariat niin, a pui panga leh a pa pathum an ni.