Egypt President-in India mipuite lawmpuina a hlan
India Republic Day lawmna, vawiina neih tura khuallian tur, Egypt president Abdel Fattah El-Sisi chuan Thawhlehni khan India a rawn thleng. Hei hi President El-Sisi-a'n India ram a rawn tlawh ṭum khatna leh, Republic Day lawmnaa khuallian tura Egypt President sawm a nih ṭum khatna a ni.
Egypt President hi minister panga leh senior official eng emaw zatin an rawn ṭawiawm a, January 27 thleng a cham ang.
El-Sisi chuan Republic Day vawi 74-na pualin India mipuite lawmpuina a hlan a, Republic Day lawmnaa khuallian a ni thei tur chu lawmawm a tih thu leh, a tan chawimawina sang tak a nih thu a sawi.
Nimin khan president Droupadi Murmu leh prime minister Narendra Modi-te chuan Rashtrapati Bhavan-ah El-Sisi hi an lo lawm a, a lawmna hun buatsaihah hian union minister-te an tel bawk.
India leh Egypt hian kumin hian inlaichinna an neih kum 75-na an lawm mek a ni. India hian G20 presidency a chelh chhung atan Egypt hi 'guest country' turin a lo sawm tawh bawk.
President El-Sisi hian nimin khan prime minister Narendra Modi chu meeting neihpuiin, ram pahniha thawhdunna leh inlaichinna ṭha leh zau zawk siam dan turte an sawidun. India rama sumdawngte pawh meeting a neihpui dawn bawk a ni.