Ram pumah Republic Day lawm a ni
India Republic Day vawi 74-na chu nimin khan ram pumah lawm a ni. A lawmna pui ber, Delhi-ah chuan Egypt president Abdel Fattah El-Sisi chu khuallian a ni.
74th Republic Day parade hi Rajpath tih ṭhin, Kartavya Path tia thlak takah neih a ni. Hei hi a hming thlak a nih hnuah Republic Day parade neih ṭum khatna a ni.
President Droupadi Murmu chuan hnam puanzar pawhpharhin, hnam hla sak a nih hnuah 21 Gun Salute in a zui bawk. Tun ṭum hi Indian field gun 105 mm hmanga 21 gun salute neih hmasa ber a ni a, a hma chuan 25-pounder gun hman a ni ṭhin.
Karvaya Path-a hun hman hma hian prime minister Narendra Modi chuan Natoinal War Memorial-ah ram tana nunna hlantu sipaite zahna a hlan a, he hunah hian defence minister Rajnath Singh bakah armed force service hotu pathum an tel.
Kartavya Path-a parade-ah hian Egypt Armed Forces contingent, sipai 144 awmna chuan bul an rawn ṭan a ni. Central Reserve Police Force all-women contigent chu thlirtute mit latu pakhat niin, marching contingent hrang hrangah hmeichhia an tel. Naval contigent chu hmeichhe officer-in kaihruaiin, hmeichhia pathum leh Agniveer paruk an tel ve bawk.
Nimina Republic Day lawmna puala ralthuam pholanaah, sorkar laipuiin intodelhna, Atmanirbharta motto a kalpui behchhanin India rama siamte chauh pholan an ni. Ralthuam pholan zingah hian 105 mm Indian Field Gun, LCH Prachand, K-9 Vajra howitzers, MBT Arjun, Nag anti-tank guided missiles, Akash air defence missiles leh Quick Reaction Fighting Vehicle-te an tel.
State leh union territory 17 bakah, ministry paruk-te tableaux 23 siamin, cultural heritage, economy lama hmasawnna leh national security lamte an lantir a ni.
Rampum huapa 'Vande Bharatam' dance competition neih aṭanga thlan chhuah, artist 479-ten cultural performance an nei bawk. Hei hi ram pum huap competition buatsaih aṭanga dancer thlanchhuahten lam an entir ṭum hnihna a ni.
Corps of Singals' Dare Devils team-in motorcycle display neiin, thlirtute lawm a hlawh hle.
Kartavya Path-a Republic Day lawmna kharna atan force pathum-a aircraft-ten air show neiin aircraft 45, vintage aircraft aṭanga Indian Air Force-te jet tharlam berte an hmang. Mahse ṭiauchhum a chhah avangin airshow hi thlirtuten duh ang takin an hmu kim thei lo.
Kumina Republic Day lawmnaah hian Central Vista, Kartavya Path, New Parliament Building satute bakah; milk, vegetable vendor leh street vendor-te sawm an ni a, gallery-ah ṭhutna bik pek an ni.
Delhi khawpuiah lawmnaah venhimna uluk
Republic Day lawmna neih tur atan hian Delhi khawpuiah venhimna uluk taka kalpui niin, parade-na hmunah security force 65,000 duty tir an ni.
Karvatya Path-a mipui che vel chu CCTV 150 hmangin thlithlai reng a ni a, heng camera-te high-resolution vek an ni. Karvatya Path bul vel leh parade kawng bula building sangte chu January 25 aṭang khan kharin, Nilaini zan aṭang khan Delhi khawpui chhungah motor lian luh khap a ni bawk.
Delhi khawpui chhunga motor tlante thlithlai leh enfiah turun Delhi police ṭhahnem tak duty tir an nih bakah, help desk 24 siam a ni. Bomb disposal team leh dog squad-te chuan khawpui chhunga bazar pui leh hmun lun laite uluk takin an enfiah bawk a ni.